མངོན་བརྗོད་ཤེས་ན་མིང་ལ་མི་རྨོངས། ཞེས་གྲགས་པ་ལྟར་གནའ་བོའི་རྒྱ་གར་དང་བོད་ཀྱི་རྩོམ་རིག་ལ་མཚོན་ན་མངོན་བརྗོད་རིག་པ་ནི་ཤིན་ཏུ་གལ་ཆེ་བས། རིག་པའི་གནས་བཅུར་འདྲེན་སྐབས་ཀྱང་མངོན་བརྗོད་རིག་པ་ཞེས་རིག་པའི་གནས་གལ་ཆེན་ཞིག་ཏུ་འདྲེན་སྲོལ་ཡོད་ཅིང་། དེ་ལ་ཆེད་དུ་སློབ་ཁྲིད་དང་བློ་འཛིན་སོགས་ཀྱང་རྒྱ་ཆེན་པོ་བགྱི་བའི་ལུགས་སྲོལ་ཡོད།

མངོན་བརྗོད་ཀྱི་བསྟན་བཅོས་ལ་རྒྱ་གར་དང་བོད་ཀྱི་མཁས་པས་མཛད་པ་མང་ན་ཡང་། འདིར་ཀརྨ་པ་མི་བསྐྱོད་རྡོ་རྗེ་ལ་སློབ་མ་མཁས་པ་མང་དུ་ཡོད་པའི་ནང་ནས་ཡོངས་སུ་གྲགས་པ་ཀརྨ་ཕྲིན་ལས་པ་གཉིས་པའམ། དཔལ་ཁང་ཆོས་མཛད་ལོ་ཙཱ་བ་ངག་དབང་ཆོས་ཀྱི་རྒྱ་མཚོ་ཞེས་དུས་རབས་བཅུ་དྲུག་པའི་ནང་དུ་བྱོན་པའི་མཁས་པ་དེ་ཉིད་ཀྱིས་རྒྱ་བོད་ཀྱི་མངོན་བརྗོད་ཀྱི་བསྟན་བཅོས་གཙོ་བོར་གྱུར་པའི་བཀའ་བསྟན་མང་པོ་ལ་ཁུངས་བཅོལ་ཞིང་ཕྱོགས་སྒྲིག་མཛད་པའི་མིང་གི་མངོན་བརྗོད་པདྨ་དཀར་པོའི་ཕྲེང་བ་ཞེས་པ་དེ་ཡིན།

དེང་སང་བོད་ཀྱི་རྩོམ་རིག་གི་འགྲོས་ལ་འགྱུར་བ་ཆེན་པོ་ཐེབས་ཟིན་པས། མཁས་པ་རྣམས་ཀྱིས་མངོན་བརྗོད་དེ་ཙམ་བེད་སྤྱོད་ཤུགས་ཆེན་པོ་གཏོང་སྲོལ་མེད་ན་ཡང་། གནའ་བོའི་རྒྱ་བོད་ཀྱི་རྩོམ་རིག་གི་གོ་བ་ཆ་ཚང་བ་དང་མ་ནོར་བ་ལེན་ཐུབ་པ་དང་། ཞིབ་འཇུག་མཐར་ཕྱིན་པ་བྱ་དགོས་ན་མངོན་བརྗོད་ཀྱི་ཡིག་ཆ་ཁྱབ་ཆེ་ལ་ཁུངས་བཙུན་པ། འཇུག་བདེ་བ་ཞིག་ནི་མེད་ཐབས་མེད་པས། ད་རེས་ཁྱད་ཆོས་དེ་དག་ཚང་བའི་མངོན་བརྗོད་ཀྱི་བསྟན་བཅོས་འདི་༸རྒྱལ་དབང་ཀརྨ་པ་བཅུ་བདུན་པ་ཆེན་པོའི་དགོངས་བཞེད་བཞིན་འཕྲུལ་དེབ་ཏུ་བཟོས་ནས་སྤེལ་བའི་ཉེར་ལེན་ལ་བརྟེན་ནས་་སློབ་གཉེར་བ་དང་། རྩོམ་པ་པོ། ལོ་ཙཱ་བ་རྣམས་ལ་ཕན་ཐོགས་ཆེན་པོ་འབྱུང་བའི་རེ་སྨོན་ཡོད།