“बोधिचर्यावतार चार परिच्छेदको सङ्‌क्षिप्‍तार्थ सरल भाषामा व्याख्या” नामक शास्‍त्र परम पूजनीय नवौँ ठङ्गु रिन्पोछेज्यूले आफ्ना शिष्यहरूलाई धर्मदेशना दिँदै गर्नुभएको अडियो रेकर्डलाई लिपिबद्ध गरिएको हो।

बोधिचर्यावतारको चार ओटा परिच्छेदहरू मात्र बताउनुको कारण, धेरै पहिले पल्टुल रिन्पोछेले बोधिचर्यावतारको धर्मदेशना विस्तृतमा छ महिना, मध्यममा तीन महिना र सङ्‌क्षिप्‍तमा बिस दिन धर्मदेशना गर्ने प्रचलन थियो। त्यसैगरी प्रवजित तथा सामान्य गृहस्थीहरू धेरै भेला भएको बेलामा, समयअनुकूल बोधिचर्यावतारकको चार परिच्छेदहरू अर्थात् बोधिचित्तानुशंसा, पापदेशना, बोधिचित्तपरिग्रह र परिणामना मात्र पटक पटक धर्मदेशना गर्नुहुन्थ्यो। सोहि अनुरूप यहाँ पनि रिन्पोछेज्यूले बोधिचर्यावतारको चार ओटा परिच्छेदहरूलाई बोलीचालीको भाषामा सरल रूपले देशना गर्नु भएको छ।