རྗེ་བཙུན་སྒྲོལ་མ་དཀར་མོ་ནི་སྒྲུབ་བརྒྱུད་ཀརྨ་ཀམ་ཚང་ལ་ཐུན་མོང་མ་ཡིན་པའི་བཀའ་བབ་ཡོད་པས་རྗེ་བཞི་པ་རོལ་པའི་རྡོ་རྗེ་དང་། དགུ་པ་དབང་ཕྱུག་རྡོ་རྗེ་སོགས་བརྒྱུད་པ་གོང་མ་མང་པོའི་ཡི་དམ་གྱི་ལྷ་གཙོ་བོ་ཡིན་ཅིང། ལྷག་པར་སི་ཏུ་སྐུ་ཕྲེང་བརྒྱད་པ་ཆོས་ཀྱི་འབྱུང་གནས་དང་། དེ་ཉིད་ཀྱི་ཐུགས་སྲས་རྒྱལ་དབང་བཅུ་གསུམ་པ་བདུད་འདུལ་རྡོ་རྗེ་སོགས་ཀྱིས་ཡི་དམ་དུ་བསྟེན་པར་མཛད་པས། ཀར་བསྟན་ཉག་ཕྲ་བའི་སྐབས་དེ་ལྟ་བུར་སྐུ་ཚེ་མཐར་ཕྱིན་པའི་སྟོབས་ཀྱིས་རྒྱལ་བསྟན་སྤྱི་དང་། བྱེ་བྲག་ལ་བཀའ་དྲིན་ཆེ་བར་གྱུར། ལྷག་པར་སི་ཏུ་པཎ་ཆེན་ནི་སྒྲུབ་བརྒྱུད་ཀརྨ་ཀམ་ཚང་ཙམ་དུ་མ་ཟད། བོད་དུ་ཕྱིས་བྱོན་པའི་མཁས་པ་ཉི་ཟླ་ལྟར་གྲགས་པ་ཡིན་ལ། དེ་ཉིད་ཀྱིས་མཛད་པའི་སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་འདི་ནི་རྒྱལ་བ་ཡབ་སྲས་རྣམས་ཀྱིས་རྒྱུན་གྱི་ཉམས་བཞེས་མཛད་ཡུལ་ཡིན་སྟབས། གལ་འགངས་ཆེ་བར་བསམས་ཏེ་ད་རེས་ང་ཚོས་འཕྲུལ་དེབ་ཏུ་བཞེངས་ནས་དམ་ཆོས་འཕྲུལ་དེབ་ཀྱི་དྲ་ཚིགས་སུ་སྤེལ་ཡོད།